ಬೆಂಗಳೂರು; 39,437 ಕೋಟಿ ಸಾರ್ವಜನಿಕ ವೆಚ್ಚವನ್ನು ಒಳಗೊಂಡಿರುವ ಸಮಗ್ರ ಘನ ತ್ಯಾಜ್ಯ ನಿರ್ವಹಣೆ ಯೋಜನೆಗೆ ಸಂಬಂಧಿಸಿದಂತೆ ಡಿಪಿಆರ್ ಸಿದ್ಧಪಡಿಸುವ ಹಂತದಿಂದ ಅಂತಿಮ ಹಣಕಾಸು ಅನುಮೋದನೆವರೆಗೆ ನಡೆದ ಸಂಪೂರ್ಣ ಪ್ರಕ್ರಿಯೆಯ ಕುರಿತು ಸಮಗ್ರ ತನಿಖೆ ನಡೆಸಬೇಕು. ಪ್ರಾಥಮಿಕ ದೃಷ್ಟಿಯಲ್ಲಿ ಅಕ್ರಮಗಳು ಸಾಬೀತಾದಲ್ಲಿ ತಕ್ಷಣವೇ ಸಿಬಿಐ, ಲೋಕಾಯುಕ್ತ ಹಾಗೂ ಇತರೆ ಸಮರ್ಥ ಭ್ರಷ್ಟಾಚಾರ ನಿಗ್ರಹ ಸಂಸ್ಥೆಗಳಿಗೆ ತನಿಖೆ ನಡೆಸಲು ಒಪ್ಪಿಸಬೇಕು ಎಂದು ಭಾರತ ಸರ್ಕಾರದ ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಉದ್ಯಮಗಳು ಹಾಗೂ ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯ ಕೇಂದ್ರ ರಾಜ್ಯ ಸಚಿವರಾದ ಶೋಭಾ ಕರಂದ್ಲಾಜೆ ಅವರು ರಾಜ್ಯ ಸರ್ಕಾರದ ಮುಖ್ಯ ಕಾರ್ಯದರ್ಶಿಗೆ ಪತ್ರ ಬರೆದಿದ್ದಾರೆ.
ಸಮಗ್ರ ಘನ ತ್ಯಾಜ್ಯ ನಿರ್ವಹಣೆ ಯೋಜನೆಗೆ ಸಂಬಂಧಿಸಿದಂತೆ ಟೆಂಡರ್ ಆಹ್ವಾನಿಸುವ ಪೂರ್ವದಲ್ಲೇ ಹಲವು ಅಕ್ರಮಗಳು ನಡೆದಿವೆ ಎಂಬ ಆರೋಪಗಳು ಕೇಳಿ ಬಂದಿದ್ದವು. ಈ ಸಂಬಂಧ ಬಿಜೆಪಿ ಉಚ್ಛಾಟಿತ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್ ಅವರು ರಾಜ್ಯ ಸರ್ಕಾರದ ಮುಖ್ಯ ಕಾರ್ಯದರ್ಶಿಗೆ ಪತ್ರವನ್ನೂ ಬರೆದಿದ್ದರು. ಈ ಪತ್ರವನ್ನು ಬದಿಗೊತ್ತಿದ್ದ ನಗರಾಭಿವೃದ್ಧಿ ಇಲಾಖೆಯು ಸಚಿವ ಸಂಪುಟದಿಂದ ಆಡಳಿತಾತ್ಮಕ ಅನುಮೋದನೆ ಪಡೆದುಕೊಂಡಿದೆ.
ಇದರ ಬೆನ್ನಲ್ಲೇ ಭಾರತ ಸರ್ಕಾರದ ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಉದ್ಯಮಗಳು ಹಾಗೂ ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯ ಕೇಂದ್ರ ರಾಜ್ಯ ಸಚಿವರಾದ ಶೋಭಾ ಕರಂದ್ಲಾಜೆ ಅವರು ರಾಜ್ಯ ಸರ್ಕಾರದ ಮುಖ್ಯ ಕಾರ್ಯದರ್ಶಿಗೆ ಬರೆದಿರುವ ಪತ್ರವು ಮುನ್ನೆಲೆಗೆ ಬಂದಿದೆ.
2026ರ ಮೇ 30ರಂದು ಬರೆದಿರುವ ಪತ್ರದ ಪ್ರತಿಯು ‘ದಿ ಫೈಲ್’ಗೆ ಲಭ್ಯವಾಗಿದೆ.
ಪತ್ರದಲ್ಲೇನಿದೆ?
ಟೆಂಡರ್ಗೆ ಸಂಬಂಧಿಸಿದಂತೆ ಉತ್ತರ ಮತ್ತು ದಕ್ಷಿಣ ಪ್ಯಾಕೇಜುಗಳಿಗೆ ಒಟ್ಟು ಸುಮಾರು ಒಳಗೊಂಡಿದೆ. ಸಾರ್ವಜನಿಕ ವಲಯದಲ್ಲಿ ಲಭ್ಯವಿರುವ ದಾಖಲೆಗಳು, ಅಧಿಕೃತ ಕಡತಗಳು ಹಾಗೂ ಸಂಬಂಧಿತ ಮಾಹಿತಿಯ ಪರಿಶೀಲನೆಯಿಂದ ಗಂಭೀರ ಪ್ರಕ್ರಿಯಾತ್ಮಕ ಅಕ್ರಮಗಳು, ಹಣಕಾಸು ಅಸಂಗತತೆಗಳು, ಕಾನೂನುಬದ್ಧ ನಿಯಮಗಳ ಉಲ್ಲಂಘನೆಗಳು ಮತ್ತು ಆಡಳಿತಾತ್ಮಕ ಪಕ್ಷಪಾತದ ಮಾದರಿಯೊಂದು ಗೋಚರಿಸುತ್ತಿವೆ. ಹೀಗಾಗಿ ರಾಜ್ಯ ಸರ್ಕಾರದ ಮುಖ್ಯ ಕಾರ್ಯದರ್ಶಿಗಳು ತಕ್ಷಣವೇ ಮಧ್ಯ ಪ್ರವೇಶಿಸುವುದು ಅಗತ್ಯವಾಗಿದೆ ಎಂದು ಸಚಿವೆ ಶೋಭಾ ಕರಂದ್ಲಾಜೆ ಅವರು ಪತ್ರದಲ್ಲಿ ಕೋರಿರುವುದು ಗೊತ್ತಾಗಿದೆ.
ಅಲ್ಲದೇ ಈ ಟೆಂಡರ್ಗೆ ಸಂಬಂಧಿಸಿದ ಎಲ್ಲಾ ಮುಂದಿನ ಕ್ರಮಗಳನ್ನು ತಕ್ಷಣವೇ ಸ್ಥಗಿತಗೊಳಿಸಬೇಕು. ಸಂಪೂರ್ಣ ಪ್ರಕ್ರಿಯೆಯ ಕುರಿತು ಸಮಗ್ರ ಹಾಗೂ ಸ್ವತಂತ್ರ ತನಿಖೆ ನಡೆಸಲು ಆದೇಶಿಸಬೇಕು ಎಂದು ಪತ್ರದಲ್ಲಿ ಆಗ್ರಹಿಸಿರುವುದು ಗೊತ್ತಾಗಿದೆ.
ಯೋಜನೆಯ ಡಿಪಿಆರ್ ಸಿದ್ಧಪಡಿಸುವ ಹಂತದಿಂದ ಅಂತಿಮ ಹಣಕಾಸು ಅನುಮೋದನೆವರೆಗೆ ನಡೆದ ಸಂಪೂರ್ಣ ಪ್ರಕ್ರಿಯೆಯ ಕುರಿತು ಸಮಗ್ರ ತನಿಖೆ ನಡೆಸಬೇಕು. ಹಣಕಾಸು ಇಲಾಖೆಯ ಆಕ್ಷೇಪಣೆಗಳು, ಕಡತದ ಟಿಪ್ಪಣಿಗಳು ಹಾಗೂ ಸಂಬಂಧಿತ ಎಲ್ಲಾ ದಾಖಲೆಗಳನ್ನು ಸುರಕ್ಷಿತವಾಗಿ ಸಂರಕ್ಷಿಸಬೇಕು. ಕಾನೂನುಬದ್ಧ ಮತ್ತು ಹಣಕಾಸು ಸುರಕ್ಷತಾ ಕ್ರಮಗಳನ್ನು ಉಲ್ಲಂಘಿಸಲು ಕಾರಣರಾದ ಪ್ರತಿಯೊಬ್ಬ ಅಧಿಕಾರಿ ಮತ್ತು ಅಧಿಕಾರಿಯ ಪಾತ್ರವನ್ನು ನಿಗದಿಪಡಿಸಬೇಕು. ಪ್ರಾಥಮಿಕ ದೃಷ್ಟಿಯಲ್ಲಿ ಅಕ್ರಮಗಳು ಸಾಬೀತಾದಲ್ಲಿ, ಈ ವಿಷಯವನ್ನು ತಕ್ಷಣವೇ ಸಿಬಿಐ, ಲೋಕಾಯುಕ್ತ ಹಾಗೂ ಇತರೆ ಸಮರ್ಥ ಭ್ರಷ್ಟಾಚಾರ ನಿಗ್ರಹ ಸಂಸ್ಥೆಗಳಿಗೆ ತನಿಖೆಗಾಗಿ ಒಪ್ಪಿಸಬೇಕು ಎಂದು ಪತ್ರದಲ್ಲಿ ಕೋರಿರುವುದು ತಿಳಿದು ಬಂದಿದೆ.
ಈ ಯೋಜನೆಯ ಪ್ರಕ್ರಿಯೆ ಸ್ಥಾಪಿತ ಟೆಂಡರ್ ಶಿಸ್ತುಗಳಿಂದ ಅನುಮಾನಾಸ್ಪದ ರೀತಿಯಲ್ಲಿ ದೂರ ಸರಿದಿರುವುದನ್ನು ತೋರಿಸುತ್ತದೆ. ಎಂ/ಎಸ್ ರೈಲ್ಸ್ ಲಿಮಿಟೆಡ್ ಸಂಸ್ಥೆಯು ಸಿದ್ಧಪಡಿಸಿದ್ದ ವಿವರವಾದ ಯೋಜನಾ ವರದಿ (DPR) ತಾಂತ್ರಿಕ ಪರಿಶೀಲನಾ ಸಮಿತಿಯ ಸಮಗ್ರ ಪರಿಶೀಲನೆಯ ಬಳಿಕ ಟಿಪ್ಪಿಂಗ್ ಶುಲ್ಕವನ್ನು ನಿಗದಿಪಡಿಸಿತ್ತು. ಆದರೆ ನಂತರ ಯಾವುದೇ ಸಮರ್ಪಕ ಕಾರಣವಿಲ್ಲದೆ ಮತ್ತು ಕಾನೂನುಬಾಹಿರವಾಗಿ, ಡಿಪಿಆರ್ ಬಿಸಿಜಿ ಸಂಸ್ಥೆಯಿಂದ ಬದಲಾಯಿಸಲಾಗಿದೆ.
ಈ ಬದಲಾವಣೆ ಕರ್ನಾಟಕ ಸಾರ್ವಜನಿಕ ಖರೀದಿ ಪಾರದರ್ಶಕತಾ ನಿಯಮಗಳಿಗೆ ವಿರುದ್ಧವಾಗಿದೆ. ಈ ಅನಿಯಮಿತ ಬದಲಾವಣೆಯ ನಂತರ ಯೋಜನೆಯ ಅಂದಾಜು ವೆಚ್ಚವು ಗಮನಾರ್ಹವಾಗಿ ಏರಿಕೆಯಾಗಿ, ಮೂಲ ತಾಂತ್ರಿಕ ಮೌಲ್ಯಮಾಪನಕ್ಕಿಂತ ಬಹಳ ಹೆಚ್ಚಿನ ಆರ್ಥಿಕ ಹೊರೆಯನ್ನು ಹೊರಿಸಿದೆ.
ಅಲ್ಲದೇ ಪುನರಾವರ್ತಿತ ಟೆಂಡರ್ ಪ್ರಕ್ರಿಯೆಯು ಕೂಡ ಗಂಭೀರ ಪ್ರಶ್ನೆಗಳು ಉದ್ಭವಿಸಲು ಕಾರಣವಾಗಿವೆ. ಮೊದಲ ಟೆಂಡರ್ ಅನುಮಾನಾಸ್ಪದ ಪರಿಸ್ಥಿತಿಗಳಲ್ಲಿ ರದ್ದುಗೊಂಡಿದೆ. ಎರಡನೇ ಟೆಂಡರ್ನಲ್ಲಿ ಎಲ್ಲಾ ಭಾಗವಹಿಸಿದವರೂ ತಾಂತ್ರಿಕವಾಗಿ ಅನರ್ಹರೆಂದು ಘೋಷಿಸಲಾಗಿದೆ. ಆಶ್ಚರ್ಯ ಎಂದರೇ ಅದೇ ಸಂಸ್ಥೆಗಳು ಮೂರನೇ ಟೆಂಡರ್ನಲ್ಲಿ ಯಾವುದೇ ಪಾರದರ್ಶಕ ವಿವರಣೆ ಇಲ್ಲದೆ ತಾಂತ್ರಿಕವಾಗಿ ಅರ್ಹರೆಂದು ಪರಿಗಣಿಸಸಲಾಗಿದೆ. ಅರ್ಹತೆಯ ಮಾನದಂಡಗಳಲ್ಲಿ ನಡೆದ ಈ ಅಸ್ಪಷ್ಟ ಬದಲಾವಣೆ ತಾಂತ್ರಿಕ ಮೌಲ್ಯಮಾಪನದಲ್ಲಿ ಹಸ್ತಕ್ಷೇಪ ನಡೆದಿದೆ ಎಂಬ ಗಂಭೀರ ಅನುಮಾನವನ್ನು ಹುಟ್ಟಿಸುತ್ತದೆ ಎಂದು ಶೋಭಾ ಕರಂದ್ಲಾಜೆ ಅವರು ಶಂಕೆ ವ್ಯಕ್ತಪಡಿಸಿರುವುದು ಪತ್ರದಿಂದ ತಿಳಿದು ಬಂದಿದೆ.
ಮೂರನೇ ಟೆಂಡರ್ ಅಧಿಸೂಚನೆಯನ್ನು ಕರ್ನಾಟಕ ಸಾರ್ವಜನಿಕ ಖರೀದಿ ಪಾರದರ್ಶಕತಾ ನಿಯಮಗಳ (ಅಧ್ಯಾಯ III ಪ್ರಕಾರ ) ಪತ್ರಿಕೆಗಳಲ್ಲಿ ಪ್ರಕಟಿಸಬೇಕಾಗಿತ್ತು. ಆದರೆ ಅದನ್ನು ಪ್ರಕಟಿಸಿಲ್ಲ ಎಂಬ ಆರೋಪಗಳಿವೆ. ಇದು ಪಾರದರ್ಶಕತೆಯ ಮೂಲ ತತ್ವವನ್ನೇ ದುರ್ಬಲಗೊಳಿಸಿದಂತಾಗಿಯಲ್ಲದೇ ಇಡೀ ಪ್ರಕ್ರಿಯೆಯ ಕಾನೂನುಬದ್ಧತೆಯ ಬಗ್ಗೆ ಅನುಮಾನ ಹುಟ್ಟಿಸುತ್ತದೆ ಎಂದು ಪತ್ರದಲ್ಲಿ ಸಂಶಯ ವ್ಯಕ್ತಪಡಿಸಿರುವುದು ಗೊತ್ತಾಗಿದೆ.
ಹಣಕಾಸು ಅಕ್ರಮಗಳು ಇನ್ನೂ ಹೆಚ್ಚು ಆತಂಕಕಾರಿಯಾಗಿವೆ. ಕನಿಷ್ಠ ದರದ ಬಿಡ್ಗಳು ಸ್ವೀಕಾರಾರ್ಹ ಮಿತಿಗಿಂತ ಬಹಳ ಹೆಚ್ಚಾಗಿದ್ದರೂ ಸಹ ಮಾತುಕತೆಗಳ ಬಳಿಕವೂ ಅವು ನಿರ್ಧರಿತ ಮಿತಿಗಿಂತ ಗಮನಾರ್ಹವಾಗಿ ಹೆಚ್ಚಳದಿಂದ ಕೂಡಿವೆ. ಇದು 2022ರ ಮೇ 10ರಂದು ಆರ್ಥಿಕ ಇಲಾಖೆ ಹೊರಡಿಸಿದ್ದ ಸುತ್ತೋಲೆಯ ಉಲ್ಲಂಘನೆಯಾಗಿದೆ. ಆ ಸುತ್ತೋಲೆ ಪ್ರಕಾರ ಬಿಡ್ ಮೊತ್ತವು ಅಂದಾಜು ಮೌಲ್ಯದ ಶೇ 10 ಕ್ಕಿಂತ ಹೆಚ್ಚಿದ್ದರೆ ಟೆಂಡರ್ ರದ್ದುಪಡಿಸಿ ಮರು-ಟೆಂಡರ್ ಕರೆಯಬೇಕು ಎಂದು ಕಡ್ಡಾಯಗೊಳಿಸಲಾಗಿದೆ. ಇಂತಹ ಅತಿಯಾದ ಟೆಂಡರ್ ಮೊತ್ತಗಳನ್ನು ಹಣಕಾಸು ನಿರ್ಬಂಧಗಳಿದ್ದರೂ ಸ್ವೀಕರಿಸಿರುವುದು ಹಣಕಾಸು ಶಿಸ್ತು ಮತ್ತು ರಕ್ಷಣಾತ್ಮಕ ಕ್ರಮಗಳನ್ನು ಉದ್ದೇಶಪೂರ್ವಕವಾಗಿ ನಿರ್ಲಕ್ಷಿಸಿರುವುದನ್ನು ಪ್ರತಿಬಿಂಬಿಸುತ್ತದೆ ಎಂದು ಪತ್ರದಲ್ಲಿ ವಿವರಿಸಿರುವುದು ತಿಳಿದು ಬಂದಿದೆ.
‘ಇದನ್ನು ಇನ್ನಷ್ಟು ಗಂಭೀರವಾಗಿಸುವ ಸಂಗತಿಯೆಂದರೆ, ಹಣಕಾಸು ಇಲಾಖೆಯ ಅಧಿಕೃತ ಕಡತದ ಟಿಪ್ಪಣಿಗಳಲ್ಲಿ ಈ ಪ್ರಸ್ತಾವನೆಯನ್ನು ಸ್ಪಷ್ಟವಾಗಿ ತಿರಸ್ಕರಿಸಲಾಗಿದೆ. ಇದು ಸ್ಥಾಪಿತ ಕಾನೂನು ಮತ್ತು ಹಣಕಾಸು ಮಾನದಂಡಗಳನ್ನು ಉಲ್ಲಂಘಿಸುತ್ತದೆ ಎಂದು ದಾಖಲಿಸಲಾಗಿದೆ. ಹಣಕಾಸು ಇಲಾಖೆ ವಿಶೇಷವಾಗಿ, ಭೂಸ್ವಾಧೀನ, ಪುನರ್ವಸತಿ ಮತ್ತು ಪುನರ್ ಸ್ಥಾಪನೆಗೆ ನ್ಯಾಯಸಮ್ಮತ ಪರಿಹಾರ ಹಾಗೂ ಪಾರದರ್ಶಕತೆ ಹಕ್ಕು ಕಾಯ್ದೆಯಡಿ (Right to Fair Compensation and Transparency in Land Acquisition Act) ಅಧಿಕಾರ ಪಡೆದ ಸಮಿತಿಯು ನಿಗದಿಪಡಿಸಿದ್ದ 1.35 ಕೋಟಿ ರು ಪ್ರತಿ ಎಕರೆ ಅಧಿಕೃತ ಭೂ ಮೌಲ್ಯಮಾಪನವನ್ನು ಈ ಪ್ರಸ್ತಾವನೆ ನಿರಾಕರಿಸಲು ಯತ್ನಿಸುತ್ತಿದೆ ಎಂದು ಗಮನಿಸಿದೆ. ಆ ಕಾಯ್ದೆಯ ಪ್ರಕಾರ ಭೂ ಮೌಲ್ಯವನ್ನು ನಿರ್ಧರಿಸುವುದು ಕಾನೂನುಬದ್ಧ ವ್ಯವಸ್ಥೆಯಾಗಿದೆ,’ ಎಂದು ಪತ್ರದಲ್ಲಿ ಗಮನ ಸೆಳೆದಿರುವುದು ಗೊತ್ತಾಗಿದೆ.
ಹಾಗೆಯೇ ಪ್ರತಿ ಎಕರೆಗೆ ₹1.50 ಕೋಟಿ ಪರಿಹಾರ ಹೆಚ್ಚಳಕ್ಕೆ ನೀಡಲಾದ ಸಮರ್ಥನೆಗಳು ಅಸ್ಪಷ್ಟವಾಗಿವೆ. ಕೇವಲ “ಅಮೂರ್ತ ಪ್ರಯೋಜನಗಳು” (Intangible Benefits) ಎಂಬ ಅಳತೆ ಮಾಡಲಾಗದ ಕಾರಣಗಳ ಮೇಲೆ ಆಧಾರಿತವಾಗಿವೆ ಎಂದು ದಾಖಲಿಸಿದೆ. ಇಂತಹ ಆಧಾರಗಳಿಗೆ ಯಾವುದೇ ಮಾನ್ಯತೆ ಪಡೆದ ಹಣಕಾಸು ನಿಯಮಗಳಲ್ಲಿ ಅವಕಾಶಗಳಿಲ್ಲ. ಇನ್ನೂ ಮಹತ್ವದ ವಿಷಯವೆಂದರೆ ಈ ರೀತಿಯ ಮನಬಂದಂತೆ ಹೆಚ್ಚುವರಿ ಪರಿಹಾರವನ್ನು ಅನುಮೋದಿಸುವುದು ಕರ್ನಾಟಕದಾದ್ಯಂತ ಅಪಾಯಕಾರಿ ಮಾದರಿಯನ್ನು ನಿರ್ಮಿಸಿದಂತಾಗುತ್ತದೆ. ರಾಜ್ಯದ ಮೌಲ್ಯಮಾಪನ ಶಿಸ್ತನ್ನು ದುರ್ಬಲಗೊಳ್ಳಲಿದೆ. ಭವಿಷ್ಯದ ಭೂಸ್ವಾಧೀನಗಳಲ್ಲಿ ಅತಿಯಾದ ಪರಿಹಾರ ಬೇಡಿಕೆಗಳಿಗೆ ಕಾರಣವಾಗಬಹುದು ಎಂದು ಇಲಾಖೆ ಎಚ್ಚರಿಸಿದೆ ಎಂದು ಗಮನ ಸೆಳೆದಿರುವುದು ತಿಳಿದು ಬಂದಿದೆ.
ಈ ಪ್ರಸ್ತಾವನೆಯ ಪ್ರಸ್ತುತ ರೂಪಕ್ಕೆ ಹಣಕಾಸು ಇಲಾಖೆ ಒಪ್ಪಿಗೆ ನೀಡಿಲ್ಲ ಹಾಗೂ ಭೂ ಮೌಲ್ಯಮಾಪನದ ತತ್ವಗಳಿಗೆ ಕಟ್ಟುನಿಟ್ಟಾಗಿ ಅನುಗುಣವಾಗಿ ಮರುಪರಿಶೀಲನೆ ಮಾಡುವಂತೆ ಸಲಹೆ ನೀಡಿದೆ. ಹಣಕಾಸು ಇಲಾಖೆಯ ಈ ಸ್ಪಷ್ಟ ಆಕ್ಷೇಪಣೆಗಳಿದ್ದರೂ ಮತ್ತು ಅವುಗಳನ್ನು ಸಚಿವ ಸಂಪುಟದ ಪರಿಗಣನೆಗೆ ಮುನ್ನವೇ ದಾಖಲಿಸಿದ್ದರೂ, ಪ್ರಸ್ತಾವನೆಯನ್ನು ಸಚಿವ ಸಂಪುಟದ ಅನುಮೋದನೆಗಾಗಿ ಮಂಡಿಸಿತ್ತು. ಇದರಿಂದ ಸಚಿವ ಸಂಪುಟಕ್ಕೆ ಈ ಗಂಭೀರ ಆಕ್ಷೇಪಣೆಗಳ ಸಂಪೂರ್ಣ ಮಾಹಿತಿ ನೀಡಲಾಗಿತ್ತೇ ಎಂಬ ಪ್ರಶ್ನೆ ಉದ್ಭವಿಸುತ್ತದೆ. ನೀಡಿದ್ದರೆ, ಯಾವ ಕಾನೂನು ಮತ್ತು ಹಣಕಾಸು ಆಧಾರದ ಮೇಲೆ ಆ ಆಕ್ಷೇಪಣೆಗಳನ್ನು ಕಡೆಗಣಿಸಲಾಯಿತು ಎಂಬ ಬಗ್ಗೆ ಪ್ರಶ್ನೆಗಳು ಏಳುತ್ತವೆ ಎಂದು ಪತ್ರದಲ್ಲಿ ವಿವರಿಸಿದ್ದಾರೆ.
ಮೂಲ ಸರ್ಕಾರಿ ಅನುಮೋದನೆಯಲ್ಲಿ ಟೆಂಡರ್ ಅಂತಿಮಗೊಳಿಸುವ ಮೊದಲು ಅಗತ್ಯವಿರುವ ಯೋಜನಾ ಭೂಮಿ ಯಾವುದೇ ಹೊಣೆಗಾರಿಕೆ, ವಿವಾದ ಅಥವಾ ನ್ಯಾಯಾಂಗ ವ್ಯಾಜ್ಯಗಳಿಂದ ಮುಕ್ತವಾಗಿರಬೇಕು. ಸರ್ಕಾರದ ಸ್ವಾಧೀನದಲ್ಲಿರಬೇಕು ಎಂದು ಸ್ಪಷ್ಟವಾಗಿ ಷರತ್ತು ವಿಧಿಸಲಾಗಿತ್ತು. ಆದರೆ ವರದಿಗಳು ಈ ಮೂಲಭೂತ ಷರತ್ತುಗಳನ್ನು ನಿರ್ಲಕ್ಷಿಸಲಾಗಿದೆ ಎಂದು ಸೂಚಿಸುತ್ತವೆ.
ಹೆಚ್ಚುವರಿ ಪರಿಹಾರದ ದರದಲ್ಲಿ ಖಾಸಗಿ ಭೂಮಿಯನ್ನು ಖರೀದಿಸುವ ಪ್ರಸ್ತಾವನೆಯನ್ನೇ ಹಣಕಾಸು ಇಲಾಖೆ ವಿರೋಧಿಸಿತ್ತು. ಆದರೂ ಭೂಮಿ ಲಭ್ಯತೆ ಖಚಿತಪಡಿಸದೆ ಟೆಂಡರ್ ಅನ್ನು ಮನಬಂದಂತೆ ಸಂಪೂರ್ಣವಾಗಿ ಅಂತಿಮಗೊಳಿಸಲಾಗಿದೆ.
ಯಶಸ್ವಿ ಬಿಡ್ ಪಡೆದ ಸಂಸ್ಥೆಗಳು ಮತ್ತು ಹಿಂದೆ ಕಳಂಕಿತಗೊಂಡ ತ್ಯಾಜ್ಯ ನಿರ್ವಹಣಾ ನಿರ್ವಾಹಕರ ನಡುವೆ ನೇರ ಹಾಗೂ ಪರೋಕ್ಷ ಸಂಪರ್ಕಗಳಿವೆ ಎಂಬ ಸಾರ್ವಜನಿಕ ವಲಯದಲ್ಲಿ ಆರೋಪಗಳು ಪದೇ ಪದೇ ಕೇಳಿ ಬರುತ್ತಿವೆ. ಹೀಗಾಗಿ ಈ ಆರೋಪಗಳನ್ನು ಪರಿಶೀಲನೆ ಮಾಡಬೇಕಿದೆ. ಟೆಂಡರ್ ಪ್ರಕ್ರಿಯೆಯ ಪ್ರಮುಖ ಹಂತಗಳಲ್ಲಿ ತಾಂತ್ರಿಕ ಅಧಿಕಾರಿಗಳನ್ನು ಪದೇ ಪದೇ ವರ್ಗಾವಣೆ ಮಾಡಿರುವುದೂ ಅಧಿಕಾರಿಗಳ ಮೇಲಿನ ಒತ್ತಡ ಹಾಗೂ ಆಡಳಿತಾತ್ಮಕ ಹಸ್ತಕ್ಷೇಪದ ಅನುಮಾನವನ್ನು ಮತ್ತಷ್ಟು ಬಲಪಡಿಸಿದಂತಿದೆ ಎಂದು ಅನುಮಾನ ವ್ಯಕ್ತಪಡಿಸಿದ್ದಾರೆ.
‘ಈ ಎಲ್ಲ ಘಟನೆಗಳ ಒಟ್ಟಾರೆ ಕ್ರಮವು ಕಾರ್ಯನಿರ್ವಾಹಕ ಅಧಿಕಾರದ ದುರುಪಯೋಗ, ಹಣಕಾಸು ಸುರಕ್ಷತಾ ಕ್ರಮಗಳನ್ನು ಉಲ್ಲಂಘಿಸಲಾಗಿದೆ. ಹಾಗೂ ಪೂರ್ವನಿರ್ಧರಿತ ಒಪ್ಪಂದವನ್ನು ಅನುಷ್ಠಾನಗೊಳಿಸಲು ಪ್ರಕ್ರಿಯೆಗಳಲ್ಲಿ ಹಸ್ತಕ್ಷೇಪದ ನಡೆಸಿರುವ ಗಂಭೀರ ಸಾಧ್ಯತೆಯನ್ನು ತೋರಿಸುತ್ತದೆ. ಇದರಿಂದ ಸಾರ್ವಜನಿಕ ವೆಚ್ಚವು ಅತಿದೊಡ್ಡ ಪ್ರಮಾಣದಲ್ಲಿ ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ಎಚ್ಚರಿಸಿರುವುದು ಪತ್ರದಿಂದ ತಿಳಿದು ಬಂದಿದೆ.
ಸಿಬಿಐ-ಲೋಕಾ ತನಿಖೆಗೆ ವಹಿಸಿ
ಈ ಟೆಂಡರ್ಗೆ ಸಂಬಂಧಿಸಿದ ಎಲ್ಲಾ ಮುಂದಿನ ಕ್ರಮಗಳನ್ನು ತಕ್ಷಣವೇ ಸ್ಥಗಿತಗೊಳಿಸಿ, ಸಂಪೂರ್ಣ ಪ್ರಕ್ರಿಯೆಯ ಕುರಿತು ಸಮಗ್ರ ಹಾಗೂ ಸ್ವತಂತ್ರ ತನಿಖೆಯನ್ನು ಆದೇಶಿಸಬೇಕು. ಯೋಜನೆಯ ಡಿಪಿಆರ್ ಸಿದ್ಧಪಡಿಸುವ ಹಂತದಿಂದ ಅಂತಿಮ ಹಣಕಾಸು ಅನುಮೋದನೆವರೆಗೆ ನಡೆದ ಸಂಪೂರ್ಣ ಪ್ರಕ್ರಿಯೆಯ ಕುರಿತು ಸಮಗ್ರ ತನಿಖೆ ನಡೆಸಬೇಕು. ಹಣಕಾಸು ಇಲಾಖೆಯ ಆಕ್ಷೇಪಣೆಗಳು, ಕಡತದ ಟಿಪ್ಪಣಿಗಳು ಹಾಗೂ ಸಂಬಂಧಿತ ಎಲ್ಲಾ ದಾಖಲೆಗಳನ್ನು ಸುರಕ್ಷಿತವಾಗಿ ಸಂರಕ್ಷಿಸಬೇಕು.
ಕಾನೂನುಬದ್ಧ ಮತ್ತು ಹಣಕಾಸು ಸುರಕ್ಷತಾ ಕ್ರಮಗಳನ್ನು ಉಲ್ಲಂಘಿಸಲು ಕಾರಣರಾದ ಪ್ರತಿಯೊಬ್ಬ ಅಧಿಕಾರಿ ಮತ್ತು ಅಧಿಕಾರಿಯ ಪಾತ್ರವನ್ನು ನಿಗದಿಪಡಿಸಬೇಕು. ಪ್ರಾಥಮಿಕ ದೃಷ್ಟಿಯಲ್ಲಿ ಅಕ್ರಮಗಳು ಸಾಬೀತಾದಲ್ಲಿ, ಈ ವಿಷಯವನ್ನು ತಕ್ಷಣವೇ ಸಿಬಿಐ, ಲೋಕಾಯುಕ್ತ ಹಾಗೂ ಇತರೆ ಸಮರ್ಥ ಭ್ರಷ್ಟಾಚಾರ ನಿಗ್ರಹ ಸಂಸ್ಥೆಗಳಿಗೆ ತನಿಖೆಗಾಗಿ ಒಪ್ಪಿಸಬೇಕು ಎಂದು ಪತ್ರದಲ್ಲಿ ಕೋರಿರುವುದು ತಿಳಿದು ಬಂದಿದೆ.
ಶೋಭಾ ಕರಂದ್ಲಾಜೆ ಅವರು ರಾಜ್ಯ ಸರ್ಕಾರದ ಮುಖ್ಯ ಕಾರ್ಯದರ್ಶಿಗೆ ಪತ್ರ ಬರೆಯುವ ಮುನ್ನವೇ ಬಿಜೆಪಿ ಉಚ್ಛಾಟಿತ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್ ಅವರು ಪತ್ರ ಬರೆದಿದ್ದರು. ಈ ಕುರಿತು ದಿ ಫೈಲ್ ವರದಿ ಪ್ರಕಟಿಸಿತ್ತು.
ಈ ಪತ್ರವು ಸರ್ಕಾರದ ಮುಖ್ಯ ಕಾರ್ಯದರ್ಶಿಗಳ ಗಮನದಲ್ಲಿದ್ದರೂ ಸಹ 21 ಪ್ಯಾಕೇಜ್ ಗಳಿಗೆ ಟೆಂಡರ್ ನಡೆಸಲು ಅನುಮೋದಿಸಿತ್ತು. ಈ ಕುರಿತು ದಿ ಫೈಲ್ ವರದಿ ಪ್ರಕಟಿಸಿತ್ತು.
ಅಲ್ಲದೆ ಟಿಪ್ಪಿಂಗ್ ಶುಲ್ಕ ನಿಗದಿಯಲ್ಲಿ ಭಾರೀ ಪ್ರಮಾಣದ ಹಗರಣ ನಡೆದಿದೆ ಮತ್ತು 30 ವರ್ಷದ ಅವಧಿಗೆ ವಾರ್ಷಿಕ ಶೇ. 5ರಷ್ಟು ಏರಿಕೆಯಂತೆ 39,437.37 ಕೋಟಿಯಷ್ಟು ಪರಿಷ್ಕೃತ ಮೊತ್ತಕ್ಕೆ ಸದ್ದಿಲ್ಲದೇ ಸಚಿವ ಸಂಪುಟವು ಅನುಮೋದಿಸಿತ್ತು.
ಈ ಕುರಿತು ‘ದಿ ಫೈಲ್’ ದಾಖಲೆ ಸಹಿತ ವರದಿ ಪ್ರಕಟಿಸಿತ್ತು.
