ಬೆಂಗಳೂರು; ರಾಯಚೂರಿನ ಹಟ್ಟಿ ಗೋಲ್ಡ್ ಮೈನ್ಸ್ಗೆ 65 ಎಂಎಂ ಫೋರ್ಜ್ಡ್ ಸ್ಟೀಲ್ ಗ್ರೈಂಡಿಂಗ್ ಬಾಲ್ಸ್ಗಳ ಸರಬರಾಜಿಗೆ ಸಂಬಂಧಿಸಿದಂತೆ ಕರೆದಿದ್ದ ಟೆಂಡರ್ನಲ್ಲಿ ಅನರ್ಹವಾಗಿದ್ದ ತೆಲಂಗಾಣ ಹೈದರಾಬಾದ್ ಮೂಲದ 1 ಮತ್ತು ಮುಂಬೈ ಮೂಲದ 1 ಕಂಪನಿ ಸೇರಿದಂತೆ ಒಟ್ಟು ಎರಡು ಕಂಪನಿಗಳ ಪ್ರಕರಣದಲ್ಲಿ ರಾಜ್ಯ ಕಾಂಗ್ರೆಸ್ ಸರ್ಕಾರವು ಅತ್ಯುತ್ಸಾಹ ತೋರಿಸಿದೆ.
ಅಲ್ಲದೇ ಈ ಎರಡೂ ಕಂಪನಿಗಳನ್ನು ತಾಂತ್ರಿಕವಾಗಿ ಅನರ್ಹವೆಂದು ಹೇಳಿದ್ದ ಹಟ್ಟಿ ಚಿನ್ನದ ಗಣಿ ಕಂಪನಿಯ ಟೆಂಡರ್ ಪರಿಶೀಲನಾ ಸಮಿತಿಯ ಆದೇಶವನ್ನೂ ರದ್ದುಗೊಳಿಸಿದೆ. ಹಾಗೆಯೇ ಈ ಕಂಪನಿಗಳ ಆರ್ಥಿಕ ಬಿಡ್ನ್ನೂ ತೆರೆಯಲು ಸರ್ಕಾರವು ಆದೇಶಿಸಿದೆ.
ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆಯ ಸರ್ಕಾರದ ಕಾರ್ಯದರ್ಶಿ ನೇತೃತ್ವದ ಪುನರ್ ಪರಿಶೀಲನಾ ಪ್ರಾಧಿಕಾರದ ಮುಂದೆ 10ಕ್ಕೂ ಹೆಚ್ಚು ಅರ್ಜಿಗಳು ಇತ್ಯರ್ಥಕ್ಕೆ ಬಾಕಿ ಇವೆ ಎಂದು ಗೊತ್ತಾಗಿದೆ. ಆದರೆ ಇದನ್ನು ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆಯ ಸರ್ಕಾರದ ಕಾರ್ಯದರ್ಶಿ ರೋಹಿಣಿ ಸಿಂಧೂರಿ ಅವರು ತಳ್ಳಿ ಹಾಕಿದ್ದಾರೆ.
‘ಪುನರ್ ಪರಿಶೀಲನೆಗೆ 2 ಅರ್ಜಿಗಳು ಮಾತ್ರ ಇದ್ದವು. 10 ಅರ್ಜಿಗಳಲ್ಲ. 2 ಅರ್ಜಿಗಳನ್ನು ಕಾನೂನು ಪ್ರಕಾರವಾಗಿಯೇ ಇತ್ಯರ್ಥಪಡಿಸಲಾಗಿದೆ,’ ಎಂದು ರೋಹಿಣಿ ಸಿಂಧೂರಿ ಅವರು ‘ದಿ ಫೈಲ್’ಗೆ ಪ್ರತಿಕ್ರಿಯಿಸಿದ್ದಾರೆ.
ಆದರೆ ದಿ ಫೈಲ್ ಗೆ ಲಭ್ಯವಿರುವ ಮಾಹಿತಿ ಪ್ರಕಾರ ಸಾಗರ್ ಮಿನರಲ್ಸ್, ಚಂದ್ರಶೇಖರ, ಕಲಂ 59 ಉಲ್ಲಂಘನೆಗೆ ಸಂಬಂಧಿಸಿದಂತೆ ಒಟ್ಟು 6 ಪ್ರಕರಣಗಳು ಬಾಕಿ ಇವೆ. ಈ ಪೈಕಿ ಇಲಾಖೆಯ ಸರ್ಕಾರದ ಹಿಂದಿನ ಕಾರ್ಯದರ್ಶಿ ಸಮೀರ್ ಶುಕ್ಲಾ ಅವರ ಅಧಿಕಾರದ ಅವಧಿಯಲ್ಲಿ ಸಾಗರ್ ಮಿನರಲ್ಸ್ ಮತ್ತು ಚಂದ್ರಶೇಖರ್ ಎಂಬುವರಿಗೆ ಸೇರಿದ ಪ್ರಕರಣಗಳಿಗೆ ಸಂಬಂಧಿಸಿದಂತೆ ಆದೇಶಕ್ಕಾಗಿ ಕಾಯ್ದಿರಿಸಲಾಗಿತ್ತು. ಇನ್ನೂ ಅಂತಿಮ ಆದೇಶ ಪ್ರಕಟವಾಗಿಲ್ಲ ಎಂದು ತಿಳಿದು ಬಂದಿದೆ.
ಆದರೂ ಬಾಕಿ ಇರುವ ಅರ್ಜಿಗಳನ್ನು ಕಾಲಮಿತಿಯಲ್ಲಿ ಪರಿಗಣಿಸದ ಇಲಾಖೆಯು, ತೆಲಂಗಾಣ ಹೈದರಾಬಾದ್ ಮತ್ತು ಮುಂಬೈ ಮೂಲದ ಎರಡು ಕಂಪನಿಗಳ ಮೇಲ್ಮನವಿ ಅರ್ಜಿಗಳನ್ನು ಜಿಂಕೆ ವೇಗದಲ್ಲಿ ಪರಿಗಣಿಸಿದೆ. ಅಲ್ಲದೇ ಈ ಸಂಬಂಧ ಅಷ್ಟೇ ಕ್ಷಿಪ್ರ ವೇಗದಲ್ಲಿ ನಿರ್ದೇಶನಗಳನ್ನೂ ನೀಡಿದೆಯಲ್ಲದೇ ಲಿಖಿತ ಆದೇಶವನ್ನೂ ಹೊರಡಿಸಿದೆ.
ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆಯು (ಎಂಎಸ್ಎಂಇ ಮತ್ತು ಗಣಿ) ಅತ್ಯಂತ ತ್ವರಿತಗತಿಯಲ್ಲಿ ತೆಲಂಗಾಣ ಮೂಲದ ಎರಡು ಕಂಪನಿಗಳ ಅರ್ಜಿಗಳಿಗೆ ಸಂಬಂಧಿಸಿದಂತೆ ಪುನರ್ ಪರಿಶೀಲಿಸಲು ಹಟ್ಟಿ ಚಿನ್ನದ ಗಣಿ ವ್ಯವಸ್ಥಾಪಕ ನಿರ್ದೇಶಕರಿಗೆ 2025ರ ನವೆಂಬರ್ 14ರಂದು ನಿರ್ದೇಶನ ನೀಡಿದೆ.
ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆಯ ಸರ್ಕಾರದ ಕಾರ್ಯದರ್ಶಿ ಮತ್ತು ಪುನರ್ ಪರಿಶೀಲನಾ ಪ್ರಾಧಿಕಾರದ ಕಾರ್ಯದರ್ಶಿ ಐಎಎಸ್ ಅಧಿಕಾರಿ ರೋಹಿಣಿ ಸಿಂಧೂರಿ ಅವರು ಈ ನಿರ್ದೇಶನ ಹೊರಡಿಸಿದ್ದಾರೆ.
ಈ ನಿರ್ದೇಶನದ ಪ್ರತಿಯು ‘ದಿ ಫೈಲ್’ಗೆ ಲಭ್ಯವಾಗಿದೆ.
65 ಎಂಎಂ ಫೋರ್ಜ್ಡ್ ಸ್ಟೀಲ್ ಗ್ರೈಂಡಿಂಗ್ ಮೀಡಿಯಾ ಬಾಲ್ಸ್ಗಳ ಸರಬರಾಜಿಗೆ ಸಂಬಂಧಿಸಿದಂತೆ ಹಟ್ಟಿ ಚಿನ್ನದ ಗಣಿಯು ಟೆಂಡರ್ ಆಹ್ವಾನಿಸಿತ್ತು. ಇದರಲ್ಲಿ ಮುಂಬೈ ವಿಳಾಸದ ಶಕ್ತಿ ಫೋರ್ಜ್ ಇಂಡಿಯಾ ಮತ್ತು ತೆಲಂಗಾಣ ಮೂಲದ ರಿಶಿಕಾ ಕೆಮಿಕಲ್ಸ್ ಭಾಗವಹಿಸಿತ್ತು. ಆದರೆ ತಾಂತ್ರಿಕ ಕಾರಣಗಳಿಂದ ಹಟ್ಟಿ ಚಿನ್ನದ ಗಣಿ ಕಂಪನಿಯು ಈ ಎರಡೂ ಕಂಪನಿಗಳನ್ನು ಅನರ್ಹಗೊಳಿಸಿತ್ತು. ಇದನ್ನು ಪ್ರಶ್ನಿಸಿದ್ದ ಈ ಎರಡೂ ಕಂಪನಿಗಳು ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆಯ ಪುನರ್ ಪರಿಶೀಲನಾ ಪ್ರಾಧಿಕಾರಕ್ಕೆ ಮೇಲ್ಮನವಿ ಸಲ್ಲಿಸಿದ್ದವು. ಈ ಮೇಲ್ಮನವಿಯಲ್ಲಿ ಹಟ್ಟಿ ಚಿನ್ನದ ಗಣಿಯ ವ್ಯವಸ್ಥಾಪಕ ನಿರ್ದೇಶಕರನ್ನು ಪ್ರತಿವಾದಿಯನ್ನಾಗಿಸಿತ್ತು ಎಂಬುದು ಗೊತ್ತಾಗಿದೆ.
2025ರ ಅಕ್ಟೋಬರ್ 29 ಮತ್ತು 2025ರ ನವೆಂಬರ್ 3ರಂದು ಈ ಕಂಪನಿಗಳು ಪುನರ್ ಪರಿಶೀಲನಾ ಪ್ರಾಧಿಕಾರದ ಮುಂದೆ ಮೇಲ್ಮನವಿ ಸಲ್ಲಿಸಿದ್ದವು ಎಂದು ತಿಳಿದು ಬಂದಿದೆ. ಈ ದಿನಾಂಕಕ್ಕೂ ಮುನ್ನವೇ ಇದೇ ಪ್ರಾಧಿಕಾರದ ಮುಂದೆ ಇನ್ನಿತರೆ ಕಂಪನಿಗಳು ಸಹ ಬೇರೆ ಬೇರೆ ಪ್ರಕರಣಗಳಲ್ಲಿ ಪುನರ್ ಪರಿಶೀಲನಾ ಪ್ರಾಧಿಕಾರದ ಮುಂದೆ ಮೇಲ್ಮನವಿ ಸಲ್ಲಿಸಿದ್ದವು ಎಂದು ಗೊತ್ತಾಗಿದೆ. ಆದರೆ ಆ ಯಾವ ಅರ್ಜಿಗಳಿಗೆ ಸಿಗದ ವೇಗವು, ಈ ಎರಡೂ ಕಂಪನಿಗಳಿಗೆ ಸಿಕ್ಕಿರುವುದು ಸಂಶಯಗಳಿಗೆ ದಾರಿ ಮಾಡಿಕೊಟ್ಟಿದೆ.
ಈ ಅಂಶಕ್ಕೂ ಪ್ರತಿಕ್ರಿಯೆ ನೀಡಿರುವ ರೋಹಿಣಿ ಸಿಂಧೂರಿ ಅವರು ‘ ಬಾಕಿ ಇರುವ 6 ಪ್ರಕರಣಗಳು ಮತ್ತು ಸಾಗರ್ ಮಿನರಲ್ಸ್, ಚಂದ್ರಶೇಖರ್ ಪ್ರಕರಣಗಳು ಪ್ರತ್ಯೇಕವಾಗಿವೆ. ಈ 2 ಅರ್ಜಿಗಳಿಗೆ ಇದು ಸಂಬಂಧವಿರುವುದಿಲ್ಲ. ಶಕ್ತಿ ಫೋರ್ಜ್ ಇಂಡಿಯಾ, ರಿಷಿಕಾ ಕೆಮಿಕಲ್ಸ್ ಪ್ರಕರಣದಲ್ಲಿ ಹಟ್ಟಿ ಗೋಲ್ಡ್ ಮೈನ್ಸ್ನ ಟೆಂಡರ್ ಪರಿಶೀಲನಾ ಸಮಿತಿಯು ಕೈಗೊಂಡಿದ್ದ ತಾಂತ್ರಿಕ ಪರಿಶೀಲನೆಯು ಕ್ರಮಬದ್ಧವಾಗಿರಲಿಲ್ಲ. ಹೀಗಾಗಿ ಅದನ್ನು ರದ್ದುಗೊಳಿಸಲಾಗಿದೆ’ ಎಂದು ಸಮರ್ಥಿಸಿಕೊಂಡಿದ್ದಾರೆ.
ಪ್ರಕರಣದ ವಿವರ
ಶಕ್ತಿ ಫೋರ್ಜ್ಡ್ ಇಂಡಿಯಾ ಮತ್ತು ರಿಶಿಕಾ ಕೆಮಿಕಲ್ಸ್ ಕಂಪನಿಗಳನ್ನು ಹಟ್ಟಿ ಚಿನ್ನದ ಗಣಿ ಕಂಪನಿಯ ವ್ಯವಸ್ಥಾಪಕ ನಿರ್ದೇಶಕರು, ತಾಂತ್ರಿಕ ಮೌಲ್ಯಮಾಪನ ವರದಿ ಪ್ರಕಾರ ಟೆಂಡರ್ (ಟೆಂಡರ್ ಸಂಖ್ಯೆ HGML/2024-25/IND0313 65, HGML/2024-25/IND0314 125 ) ನಲ್ಲಿ ಅನರ್ಹಗೊಳಿಸಿದ್ದರು. ಇದನ್ನು ಈ ಎರಡೂ ಕಂಪನಿಗಳು ಪ್ರಶ್ನಿಸಿದ್ದವು.
ಈ ಅರ್ಜಿಗಳನ್ನು ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆಯು ಪರಿಶೀಲಿಸಿತ್ತು. ಬಿಡ್ದಾರರ ಸಂದರ್ಭಗಳನ್ನು ಗಮನದಲ್ಲಿಟ್ಟುಕೊಂಡು ತಾಂತ್ರಿಕ ಮೌಲ್ಯಮಾಪನವನ್ನೇ ಮರು ಪರಿಶೀಲಿಸಬೇಕು ಎಂದು ಪುನರ್ ಪರಿಶೀಲನಾ ಪ್ರಾಧಿಕಾರದ ಕಾರ್ಯದರ್ಶಿ ರೋಹಿಣಿ ಸಿಂಧೂರಿ ಅವರು ನಿರ್ದೇಶಿಸಿರುವುದು ಗೊತ್ತಾಗಿದೆ.
ಕರ್ನಾಟಕ ಪಾರದರ್ಶಕತೆ ಸಾರ್ವಜನಿಕ ಸಂಗ್ರಹಣೆ ಕಾಯಿದೆ, 1999 ಮತ್ತು ಒಟ್ಟಾರೆ ಆಡಳಿತಾತ್ಮಕ ವಿವೇಚನೆಗೆ ಅನುಗುಣವಾಗಿ ಟೆಂಡರ್ ಪ್ರಕ್ರಿಯೆಯು ನಡೆಯಬೇಕು. ಈ ಸಂಬಂಧ ನಿರ್ದೇಶನಗಳನ್ನು ನೀಡಬೇಕು ಎಂದು ಅರ್ಜಿದಾರರ ಕಂಪನಿಗಳ ಕೋರಿಕೆಗೆ ಇಲಾಖೆಯು ಅತ್ಯಂತ ಮುತುವರ್ಜಿ ವಹಿಸಿ ಮನ್ನಣೆ ನೀಡಿರುವುದು ಪ್ರಾಧಿಕಾರದ ಆದೇಶದಿಂದ ತಿಳಿದು ಬಂದಿದೆ.
ಮೇಲ್ಮನವಿದಾರರಿಗೆ ಸಂಬಂಧಿಸಿದಂತೆ ಅವಲೋಕನಗಳಿವು
ಡೀಲರ್ ಶಿಪ್ ಪ್ರಮಾಣ ಪತ್ರ ಮತ್ತು ಅನುಭವ ದಾಖಲಾತಿ ಸೇರಿದಂತೆ ಇನ್ನಿತರೆ ಕೆಲವು ದಾಖಲೆಗಳ ಸ್ವರೂಪ ಮತ್ತು ಸಿಂಧುತ್ವಕ್ಕೆ ಸಂಬಂಧಿಸಿದಂತೆ ದಾಖಲೆಗಳನ್ನು ಟೆಂಡರ್ ಪರಿಶೀಲನಾ ಸಮಿತಿಯು ಉಲ್ಲೇಖಿಸಿತ್ತು. ಇದನ್ನಾಧರಿಸಿ ಈ ಎರಡೂ ಕಂಪನಿಗಳು ತಾಂತ್ರಿಕವಾಗಿ ಅರ್ಹವಾಗಿಲ್ಲ ಎಂದು ತನ್ನ ತೀರ್ಮಾನ ಪ್ರಕಟಿಸಿತ್ತು. ಈ ತೀರ್ಮಾನವನ್ನೂ ಸಹ ಪ್ರಾಧಿಕಾರವು ಗಮನಿಸಿರುವುದು ಗೊತ್ತಾಗಿದೆ.
ಕಂಪನಿಗಳ ಈ ಹಿಂದಿನ ಕಾರ್ಯಕ್ಷಮತೆ ಮತ್ತು ಪೂರೈಕೆಯ ಸ್ಥಿರತೆಗೆ ಸಂಬಂಧಿಸಿದಂತೆ ಪ್ರಾಧಿಕಾರವು ಪರಿಶೀಲಿಸಿದೆ. ಈ ಹಿಂದೆ ಇದೇ ಕಂಪನಿಗಳು 65 ಎಂಎಂ ಮತ್ತು 125 ಎಂಎಂ ಫೋರ್ಜ್ಡ್ ಮೀಡಿಯಾ ಬಾಲ್ಸ್ಗಳನ್ನುಎಚ್ಜಿಎಂಎಲ್ಗೆ ಮೊದಲೇ ಪೂರೈಸಿದೆ ಎಂದು ಗಮನಿಸಿದೆ. ಬಿಡ್ದಾರರ ಪ್ರಾಯೋಗಿಕ ಸಾಮರ್ಥ್ಯ ಮತ್ತು ವಿಶ್ವಾಸಾರ್ಹತೆಯನ್ನು ನಿರ್ಣಯಿಸುವಾಗ ಸಹಜವಾಗಿಯೇ ಪ್ರಸ್ತುತತೆ ಹೊಂದಿದೆ ಎಂದು ಉಲ್ಲೇಖಿಸಿರುವುದು ತಿಳಿದು ಬಂದಿದೆ.
ಬಾವೋಜಿ ಯಿಲಿಟ್ ಫೋರ್ಜ್ ಕಂಪನಿ ಲಿಮಿಟೆಡ್ಗೆ ಸಂಬಂಧಿಸಿದಂತೆ ಒದಗಿಸಿರುವ ದಾಖಲಾತಿಗಳು ಮತ್ತು ಸಾಂಸ್ಥಿಕತೆ, ಕಾರ್ಯಾಚರಣೆಯ ಸಾಮರ್ಥ್ಯದಲ್ಲಿ ನಿರಂತರತೆ ಇದೆ. ವಿವರಣಾತ್ಮಕ ವ್ಯತ್ಯಾಸಗಳು ಸಹ ಅಸ್ತಿತ್ವದಲ್ಲಿವೆ. ಈ ಬಗ್ಗೆ ಸೂಕ್ಷ್ಮವಾಗಿ ಪರಿಶೀಲನೆ ನಡೆಸುವ ಅಗತ್ಯವಿದೆ ಎಂದು ಪುನರ್ ಪರಿಶೀಲನಾ ಪ್ರಾಧಿಕಾರವು ಹೇಳಿದೆ.
ತಾಂತ್ರಿಕ ಸಾಮರ್ಥ್ಯವನ್ನು ನಿರ್ಣಯಿಸುವಾಗ ಟೆಂಡರ್ ಪರಿಶೀಲನಾ ಸಮಿತಿಯು ನಡೆಸಿದ್ದ ವಿಧಾನವು ಪರಿಪೂರ್ಣವಾಗಿರಲಿಲ್ಲ ಎಂದು ಪ್ರಾಧಿಕಾರವು ಅಭಿಪ್ರಾಯಿಸಿರುವುದು ಗೊತ್ತಾಗಿದೆ.
ರಿಷಿಕಾ ಕೆಮಿಕಲ್ಸ್ಗೆ ಸಂಬಂಧಿಸಿದಂತೆ ಅವಲೋಕನವೇನು?
ರಿಷಿಕಾ ಕೆಮಿಕಲ್ಸ್ ತನ್ನ ಪೂರ್ವ ಅನುಭವಕ್ಕೆ ಪೂರಕವಾಗಿ ಸಲ್ಲಿಸಲಾದ ಕೆಲವು ದಾಖಲೆಗಳ ದೃಢೀಕರಣದ ಬಗ್ಗೆ ಟೆಂಡರ್ ಪರಿಶೀಲನಾ ಸಮಿತಿಯು ಹಲವು ಪ್ರಶ್ನೆಗಳನ್ನು ಎತ್ತಿತ್ತು. ಹೀಗಾಗಿ ಈ ಕಂಪನಿಯನ್ನು ತಾಂತ್ರಿಕವಾಗಿ ಅನರ್ಹ ಎಂದು ವರ್ಗೀಕರಿಸಲಾಗಿದೆ. ಸಮಿತಿಯ ಈ ನಿರ್ಧಾರವನ್ನು ಪ್ರಾಧಿಕಾರವು ಗಮನಿಸಿದೆ. ಹೀಗಾಗಿ ಅಂತಹ ವಿಷಯಗಳ ಬಗ್ಗೆ ಯಾವುದೇ ನಿರ್ಣಾಯಕ ಅಭಿಪ್ರಾಯವನ್ನು ವ್ಯಕ್ತಪಡಿಸದೇ ಟೆಂಡರ್ನ ಸ್ವರೂಪಕ್ಕೆ ಕಠಿಣ ಮತ್ತು ದಾಖಲೆಗಳ ಪರಿಶೀಲನೆ ಪ್ರಾಮುಖ್ಯತೆ ಕುರಿತು ಈ ಪ್ರಾಧಿಕಾರವು ಒತ್ತಿ ಹೇಳಿದೆ.
ಕಾರ್ಯಾಚರಣೆಯ ನಿರ್ದೇಶನಗಳೇನು?
ಕರ್ನಾಟಕ ಪಾರದರ್ಶಕತೆ ಸಾರ್ವಜನಿಕ ಸಂಗ್ರಹಣೆ ಕಾಯಿದೆ, 1999 ರ ಸೆಕ್ಷನ್ 15 ರ ಅಡಿಯಲ್ಲಿ ನೀಡಲಾದ ಅಧಿಕಾರ ಮತ್ತು ಈ ಪ್ರಾಧಿಕಾರವು ಹೊಂದಿರುವ ಅಧಿಕಾರ ವ್ಯಾಪ್ತಿಯನ್ನು ಚಲಾಯಿಸಿದೆ. ಟೆಂಡರ್ ಸ್ವೀಕರಿಸುವ ಪ್ರಾಧಿಕಾರವು ಸ್ವತಂತ್ರವಾಗಿ ಅಗತ್ಯವೆಂದು ಪರಿಗಣಿಸಬಹುದಾದ ಯಾವುದೇ ಮುಂದಿನ ನಿರ್ಧಾರಗಳಿಗೆ ಪೂರ್ವಾಗ್ರಹವಿಲ್ಲದೆ ನಿರ್ದೇಶನಗಳನ್ನು ನೀಡಿದೆ ಎಂದು ಪ್ರಾಧಿಕಾರವು ಹೇಳಿದೆ.
ಇದರ ಪ್ರಕಾರ ಶಕ್ತಿ ಪೋರ್ಜ್ ಇಂಡಿಯಾ ಮತ್ತು ರಿಷಿಕಾ ಕೆಮಿಕಲ್ಸ್ನ್ನು ತಾಂತ್ರಿಕವಾಗಿ ಅನರ್ಹ ಎಂದು ಘೋಷಿಸಿದ್ದ ಟೆಂಡರ್ ಪರಿಶೀಲನಾ ಸಮಿತಿಯ (ದಾಖಲೆ ಸಂಖ್ಯೆ 7) ತೀರ್ಮಾನವನ್ನು ರದ್ದುಗೊಳಿಸಿದೆ. ಅಲ್ಲದೇ ಹಟ್ಟಿ ಚಿನ್ನದ ಗಣಿ ಕಂಪನಿಯು ಸೂಕ್ತವೆಂದು ಪರಿಗಣಿಸಬಹುದಾದ ಮತ್ತು ಅನ್ವಯಿಸಬಹುದಾದ ಎಲ್ಲಾ ಪ್ರಕ್ರಿಯೆಗಳು ಹಾಗೂ ಭವಿಷ್ಯದ ಪರಿಶೀಲನೆಗಳಿಗೆ ಒಳಪಟ್ಟು ಈ ಕಂಪನಿಗಳು ತಾಂತ್ರಿಕ ಅರ್ಹತೆಯ ಮಿತಿಯನ್ನು ಪೂರೈಸಿದೆ ಎಂದು ಪರಿಗಣಿಸಲಾಗುತ್ತದೆ ಎಂದು ಹೇಳಿದೆ.
ಅಲ್ಲದೇ ತಾಂತ್ರಿಕವಾಗಿ ಅರ್ಹರೆಂದು ಪರಿಗಣಿಸಲಾದ ಬಿಡ್ದಾರರಿಗೆ ಅನ್ವಯವಾಗುವ ಕಾರ್ಯವಿಧಾನಗಳಿಗೆ ಅನುಗುಣವಾಗಿ ಶಕ್ತಿ ಪೋರ್ಜ್ ಇಂಡಿಯಾ ಮತ್ತು ರಿಷಿಕಾ ಕೆಮಿಕಲ್ಸ್ ಸಲ್ಲಿಸಿದ್ದ ಆರ್ಥಿಕ ಬಿಡ್ನ್ನು ತೆರೆಯಬೇಕು. ಮತ್ತು ಮೌಲ್ಯಮಾಪನ ಮಾಡಬೇಕು ಎಂದು ಪ್ರಾಧಿಕಾರವು ಹಟ್ಟಿ ಚಿನ್ನದ ಗಣಿಗೆ ನಿರ್ದೇಶಿಸಿದೆ.
ದಾಖಲೆಗಳ ದೃಢೀಕರಣದ ಕುರಿತು ಮುಚ್ಚಳಿಕೆ
ಶಕ್ತಿ ಫೋರ್ಜ್ಡ್ ಇಂಡಿಯಾ ಮತ್ತು ರಿಷಿಕಾ ಕೆಮಿಕಲ್ಸ್ ಸೇರಿದಂತೆ ಟೆಂಡರ್ ಪ್ರಕ್ರಿಯೆಯಲ್ಲಿ ಭಾಗವಹಿಸುವ ಬಿಡ್ದಾರರು ಯಾವುದೇ ತಪ್ಪಾದ, ನಕಲಿ ಅಥವಾ ದಾರಿತಪ್ಪಿಸುವ ದಾಖಲೆಯನ್ನು ಒದಗಿಸಿಲ್ಲ ಎಂದು ದೃಢೀಕರಿಸುವ ದೃಢೀಕೃತ ಮುಚ್ಚಳಿಕೆಯನ್ನು ಒದಗಿಸಬೇಕು ಎಂದು ಪ್ರಾಧಿಕಾರವು ತನ್ನ ಆದೇಶದಲ್ಲಿ ಸೂಚಿಸಿರುವುದು ಗೊತ್ತಾಗಿದೆ.
ತಪ್ಪಾದ ಮಾಹಿತಿಯನ್ನು ನೀಡಿದ್ದರೇ ಟೆಂಡರ್ ಷರತ್ತುಗಳ ಪ್ರಕಾರ ಕ್ರಮ ಕೈಗೊಳ್ಳಬಹುದು. ಇದರಲ್ಲಿ ಇಎಂಡಿ/ಭದ್ರತಾ ಠೇವಣಿ ಮುಟ್ಟುಗೋಲು ಮತ್ತು ಒಪ್ಪಂದದ ಮುಕ್ತಾಯವೂ ಸಹ ಸೇರಿರುತ್ತವೆ.
ಭವಿಷ್ಯದ ಟೆಂಡರ್ಗಳಲ್ಲಿ ದಾಖಲೆಗಳ ಪರಿಶೀಲನೆಗೆ ಸಂಬಂಧಿಸಿದಂತೆ ಸಮಗ್ರ ಮತ್ತು ಸೂಕ್ತವಾಗಿ ಮಾಪನಾಂಕ ನಿರ್ಣಯಿಸಿದ ವಿಧಾನವನ್ನು ಅಳವಡಿಸಿಕೊಳ್ಳಬೇಕು ಎಂದು ಟೆಂಡರ್ ಪರಿಶೀಲನಾ ಸಮಿತಿಯ ಪ್ರಾಧಿಕಾರಕ್ಕೆ ಪುನರ್ ಪರಿಶೀಲನಾ ಪ್ರಾಧಿಕಾರವು ನಿರ್ದೇಶಿಸಿದೆ.
ಈ ಆದೇಶದಲ್ಲಿ ಯಾವುದೂ ಕಾರ್ಯವಿಧಾನದ ನ್ಯಾಯಸಮ್ಮತತೆ ಮತ್ತು ಆಡಳಿತಾತ್ಮಕ ಶ್ರದ್ಧೆಯ ಹಿತಾಸಕ್ತಿಯಲ್ಲಿ ಸ್ಪಷ್ಟೀಕರಣಗಳನ್ನು ಪಡೆಯಲು, ಪರಿಶೀಲನೆಗಳನ್ನು ಕೈಗೊಳ್ಳಲು ಅಥವಾ ಅಗತ್ಯವೆಂದು ಪರಿಗಣಿಸುವ ಯಾವುದೇ ಹೆಚ್ಚುವರಿ ಕ್ರಮಗಳನ್ನು ಅಳವಡಿಸಿಕೊಳ್ಳುವ ಸಂಬಂಧ ಹಟ್ಟಿ ಚಿನ್ನ ಗಣಿ ಕಂಪನಿಯನ್ನು ಈ ಪ್ರಾಧಿಕಾರವು ತಡೆಯುವುದಿಲ್ಲ ಎಂದು ಹೇಳಿರುವುದು ತಿಳಿದು ಬಂದಿದೆ.
