ಬೆಂಗಳೂರು; ಆರೋಗ್ಯ, ಕುಟುಂಬ ಸೇವೆಗಳು ಮತ್ತು ಆಯುಷ್ ಇಲಾಖೆಯು ಕಳೆದ ಮೂರು ವರ್ಷಗಳಲ್ಲಿ ಬಿಡುಗಡೆಯಾಗಿದ್ದ ಒಟ್ಟು ಅನುದಾನದಲ್ಲಿ 5,653.43 ಕೋಟಿ ರುಗಳನ್ನು ವೆಚ್ಚ ಮಾಡದೆಯೇ ಉಳಿಸಿಕೊಂಡಿತ್ತು.
ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯು ಕಳೆದ ಮೂರು ವರ್ಷಗಳಲ್ಲಿ ಮಂಜೂರಾಗಿದ್ದ ಅನುದಾನ, ಬಿಡುಗಡೆಯಾಗಿದ್ದ ಅನುದಾನ, ವೆಚ್ಚ ಮತ್ತು ವೆಚ್ಚ ಮಾಡದೇ ಬಾಕಿ ಉಳಿಸಿಕೊಂಡಿದ್ದ ಮೊತ್ತದ ವಿವರಗಳನ್ನು ಕರ್ನಾಟಕ ವಿಧಾನಮಂಡಲದ ಅನುಸೂಚಿತ ಮತ್ತು ಅನುಸೂಚಿತ ಪಂಗಡಗಳ ಕಲ್ಯಾಣ ಸಮಿತಿಗೆ ನೀಡಿದೆ.
2026-27ನೇ ಸಾಲಿನ ಆಯವ್ಯಯಕ್ಕೆ ಸಂಬಂಧಿಸಿದಂತೆ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಸಚಿವ ದಿನೇಶ್ ಗುಂಡೂರಾವ್ ಅವರು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರೊಂದಿಗೆ ಪೂರ್ವಭಾವಿ ಸಭೆಯಲ್ಲಿ ಮಾಹಿತಿ, ಯೋಜನೆಗಳನ್ನು ಹಂಚಿಕೊಂಡಿದ್ದಾರೆ. ಇದರ ಬೆನ್ನಲ್ಲೇ ಕಳೆದ 3 ವರ್ಷಗಳಲ್ಲಿ ಬಿಡುಗಡೆಯಾಗಿದ್ದ ಒಟ್ಟಾರೆ ಅನುದಾನದಲ್ಲಿ 5,563.43 ಕೋಟಿಯಷ್ಟು ಮೊತ್ತವನ್ನು ಖರ್ಚು ಮಾಡಿರಲಿಲ್ಲ ಎಂಬ ಸಂಗತಿಯು ಮುನ್ನೆಲೆಗೆ ಬಂದಿದೆ.
ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯು ಕರ್ನಾಟಕ ವಿಧಾನಮಂಡಲದ ಅನುಸೂಚಿತ ಮತ್ತು ಅನುಸೂಚಿತ ಪಂಗಡಗಳ ಕಲ್ಯಾಣ ಸಮಿತಿಗೆ ನೀಡಿರುವ ಮಾಹಿತಿ ಮತ್ತು 2026-27ನೇ ಸಾಲಿನ ಆಯವ್ಯಯಕ್ಕೆ ಸಂಬಂಧಿಸಿದಂತೆ ಇಲಾಖೆಯು ಬಜೆಟ್ ಪೂರ್ವಭಾವಿ ಸಭೆಗೆ ನೀಡಿರುವ ಮಾಹಿತಿಯ ಅಂಕಿ ಸಂಖ್ಯೆಯು ‘ದಿ ಫೈಲ್’ಗೆ ಲಭ್ಯವಾಗಿದೆ.
ಕಳೆದ ಮೂರು ವರ್ಷಗಳಲ್ಲಿ ಇಲಾಖೆಯ ಅಧೀನದಲ್ಲಿನ ನಿಗಮ, ಮಂಡಳಿ, ಪ್ರಾಧಿಕಾರ, ಸಂಸ್ಥೆ, ನಿರ್ದೇಶನಾಲಯ ಮತ್ತು ಆಯುಕ್ತಾಲಯಗಳಿಗೆ ಒದಗಿಸಿದ್ದ ಅನುದಾನವನ್ನು ಒಟ್ಟಾರೆ 37,891.58 ಕೋಟಿ ರು ಗೆ ಪರಿಷ್ಕರಿಸಲಾಗಿತ್ತು. ಈ ಪೈಕಿ 36,116.86 ಕೋಟಿ ರು ಬಿಡುಗಡೆಯಾಗಿದ್ದರೇ ಈ ಪೈಕಿ 32,350.31 ಕೋಟಿ ರುಪಾಯಿ ಖರ್ಚಾಗಿತ್ತು.
2022-23ನೇ ಸಾಲಿನಲ್ಲಿ ಆರೋಗ್ಯ ಮತ್ತು ಕುಟುಂಬ ಇಲಾಖೆಯು ತನ್ನ ಅಧೀನದಲ್ಲಿನ ನಿಗಮ, ಮಂಡಳಿ, ಪ್ರಾಧಿಕಾರ, ಸಂಸ್ಥೆ, ನಿರ್ದೇಶನಾಲಯ ಮತ್ತು ಆಯುಕ್ತಾಲಯಗಳಿಗೆ ಒಟ್ಟಾರೆ 9,577.14 ಕೋಟಿ ರುಪಾಯಿ ಅನುದಾನವು ಮಂಜೂರಾಗಿತ್ತು. ನಂತರ ಈ ಅನುದಾನವನ್ನು 11,523.61 ಕೋಟಿ ರುಪಾಯಿಗೆ ಪರಿಷ್ಕರಿಸಲಾಗಿತ್ತು.
ಈ ಪೈಕಿ 10,886.70 ಕೋಟಿ ರುಪಾಯಿ ಬಿಡುಗಡೆಯಾಗಿತ್ತು. ಇದರಲ್ಲಿ 9,390.10 ಕೋಟಿ ರುಪಾಯಿ ಖರ್ಚು ಮಾಡಿದ್ದರೇ ಖರ್ಚು ಮಾಡಲು 2,133.51 ಕೋಟಿ ರು ಉಳಿಸಿಕೊಂಡಿತ್ತು.
2023-24ನೇ ಸಾಲಿನಲ್ಲಿ ಇಲಾಖೆಯು ತನ್ನ ಅಧೀನದಲ್ಲಿನ ನಿಗಮ, ಮಂಡಳಿ, ಪ್ರಾಧಿಕಾರ, ಸಂಸ್ಥೆ, ನಿರ್ದೇಶನಾಲಯ ಮತ್ತು ಆಯುಕ್ತಾಲಯಗಳಿಗೆ ಒಟ್ಟಾರೆ 10,504.33 ಕೋಟಿ ರು ಅನುದಾನವು ಮಂಜೂರಾಗಿತ್ತು. ನಂತರ ಈ ಅನುದಾನವನ್ನು 11,322.36 ಕೋಟಿ ರುಪಾಯಿಗೆ ಪರಿಷ್ಕರಿಸಲಾಗಿತ್ತು. ಈ ಪೈಕಿ 10,798.92 ಕೋಟಿ ರುಪಾಯಿ ಬಿಡುಗಡೆಯಾಗಿತ್ತು.
ಬಿಡುಗಡೆಯಾಗಿದ್ದ ಈ ಅನುದಾನದಲ್ಲಿ 9,788.95 ಕೋಟಿ ರುಪಾಯಿ ಖರ್ಚು ಮಾಡಿದ್ದರೇ, 1,533.41 ಕೋಟಿ ರುಪಾಯಿ ವೆಚ್ಚವಾಗಿರಲಿಲ್ಲ.
2024-25ನೇ ಸಾಲಿನಲ್ಲಿ ಇಲಾಖೆಯು ತನ್ನ ಅಧೀನದಲ್ಲಿನ ನಿಗಮ, ಮಂಡಳಿ, ಪ್ರಾಧಿಕಾರ, ಸಂಸ್ಥೆ, ನಿರ್ದೇಶನಾಲಯ ಮತ್ತು ಆಯುಕ್ತಾಲಯಗಳಿಗೆ ಒಟ್ಟಾರೆ 10,813.48 ಕೋಟಿ ರುಪಾಯಿ ಮಂಜೂರಾಗಿತ್ತು. ಆ ನಂತರ 11,545.27 ಕೋಟಿ ರುಪಾಯಿಗೆ ಪರಿಷ್ಕರಿಸಲಾಗಿತ್ತು. ಈ ಪೈಕಿ 11,397.07 ಕೋಟಿ ರುಪಾಯಿ ಬಿಡುಗಡೆಯಾಗಿತ್ತು.
ಬಿಡುಗಡೆಯಾಗಿದ್ದ ಈ ಅನುದಾನದಲ್ಲಿ 10,237.68 ಕೋಟಿ ರುಪಾಯಿ ಖರ್ಚು ಮಾಡಲಾಗಿತ್ತು. ಈ ಅವಧಿಯಲ್ಲಿ 1,307.60 ಕೋಟಿ ರುಪಾಯಿ ಖರ್ಚಾಗಿರಲಿಲ್ಲ.
ಇಲಾಖೆಯ ಅಧೀನದಲ್ಲಿನ ನಿಗಮ, ಮಂಡಳಿ, ಪ್ರಾಧಿಕಾರ, ಸಂಸ್ಥೆ, ನಿರ್ದೇಶನಾಲಯ ಮತ್ತು ಆಯುಕ್ತಾಲಯಗಳಿಗೆ ಪರಿಶಿಷ್ಟ ಜಾತಿಗಳ ಉಪಯೋಜನೆ ಮತ್ತು ಬುಡಕಟ್ಟು ಉಪ ಯೋಜನೆಗಳ ಅಡಿಯಲ್ಲಿ ಒದಗಿಸಿದ್ದ ಅನುದಾನದಲ್ಲಿ ಒಟ್ಟಾರೆ 3,500.34 ಕೋಟಿ ರುಪಾಯಿಗೆ ಪರಿಷ್ಕರಿಸಲಾಗಿತ್ತು. 3,234.17 ಕೋಟಿ ರುಪಾಯಿ ಬಿಡುಗಡೆಯಾಗಿತ್ತು.
ಈ ಪೈಕಿ 2,933.58 ಕೋಟಿ ರುಪಾಯಿ ಖರ್ಚಾಗಿದ್ದರೇ 566.76 ಕೋಟಿ ರುಪಾಯಿ ವೆಚ್ಚವಾಗಿರಲಿಲ್ಲ.
ಜಿಲ್ಲಾ ವಲಯದಲ್ಲಿರುವ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಿಗಾಗಿ 2,796.41 ಕೋಟಿ ರುಪಾಯಿ ಒದಗಿಸಿತ್ತು. ಬಿಡುಗಡೆಯಾಗಿದ್ದ ಅನುದಾನದಲ್ಲಿ 116.61 ಕೋಟಿ ರುಪಾಯಿಗಳನ್ನು ಖರ್ಚು ಮಾಡಿರಲಿಲ್ಲ.
ಆರೋಗ್ಯ ಕವಚದಡಿಯಲ್ಲಿ ಕಳೆದ ಮೂರು ವರ್ಷದಲ್ಲಿ ಒಟ್ಟಾರೆ 420.33 ಕೋಟಿ ರು ಅನುದಾನ ಒದಗಿಸಿತ್ತು. ಇದರಲ್ಲಿ 358.44 ಕೋಟಿ ರುಪಾಯಿ ಬಿಡುಗಡೆಯಾಗಿತ್ತು. 346.4 ಕೋಟಿ ರು ಖರ್ಚಾಗಿತ್ತು. ಇನ್ನೂ 73.93 ಕೋಟಿ ರುಪಾಯಿ ಖರ್ಚಾಗಿರಲಿಲ್ಲ.
ಶುಚಿ ಯೋಜನೆಗೆ ಬಿಡುಗಡೆಯಾಗದ ನಯಾಪೈಸೆ
ಹಾಗೆಯೇ 2022-23ನೇ ಸಾಲಿನ ರಾಜ್ಯ ವಲಯದ ಕಾರ್ಯಕ್ರಮದಡಿಯಲ್ಲಿ ಶುಚಿ ಯೋಜನೆಗೆ ಮಂಜೂರಾಗಿದ್ದ 49.00 ಕೋಟಿ ರುಪಾಯಿ, ಕ್ಯಾನ್ಸರ್ ಪತ್ತೆಗಾಗಿ ಸಂಚಾರಿ ಪ್ರಯೋಗಾಲಯಗಳಿಗಾಗಿ 4.50 ಕೋಟಿ ರುಪಾಯಿ ಮಂಜೂರಾಗಿದ್ದರೂ ನಯಾ ಪೈಸೆಯನ್ನೂ ಬಿಡುಗಡೆ ಮಾಡಿರಲಿಲ್ಲ. ಆಸ್ಪತ್ರೆ ನಿರ್ಮಾಣ, ಉನ್ನತೀಕರಣಕ್ಕೆ 480 ಕೋಟಿ ರುಪಾಯಿ ಅನುದಾನದಲ್ಲಿ 464.91 ಕೋಟಿ ರುಪಾಯಿ ಬಿಡುಗಡೆಯಾಗಿತ್ತು. ಆದರೆ ಈ ಪೈಕಿ 20.16 ಕೋಟಿಯಷ್ಟು ಅನುದಾನವನ್ನು ಖರ್ಚು ಮಾಡದೇ ಬಾಕಿ ಇರಿಸಿಕೊಂಡಿತ್ತು. ಆಶಾ ಕಾರ್ಯಕರ್ತೆಯರುಗಳಿಗೆ ಗೌರವ ಧನ ಪಾವತಿಸಲು 255.14 ಕೋಟಿ ರು ಮಂಜೂರಾಗಿದ್ದ ಅನುದಾನದಲ್ಲಿ 13.78 ಕೋಟಿ ರು ವೆಚ್ಚ ಮಾಡಿರಲಿಲ್ಲ.
ಕೇಂದ್ರ ಪುರಸ್ಕೃತ ಅಡಿಯಲ್ಲಿ ರಾಷ್ಟ್ರೀಯ ಗ್ರಾಮೀಣ ಆರೋಗ್ಯ ಅಭಿಯಾನಕ್ಕೆ ಕೇಂದ್ರದ ಪಾಲಿನಲ್ಲಿ 1,621.14 ಕೋಟಿ ರುಪಾಯಿಯಲ್ಲಿ 514.69 ಕೋಟಿ ರು ಖರ್ಚಾಗಿರಲಿಲ್ಲ. ಅದೇ ರೀತಿ ರಾಜ್ಯದ ಪಾಲಿನಲ್ಲಿ 125.59 ಕೋಟಿ ರುಪಾಯಿ ವೆಚ್ಚವಾಗಿರಲಿಲ್ಲ. ಆಯುಷ್ಮಾನ್ ಭಾರತ್ ಆರೋಗ್ಯ ಮೂಲ ಸೌಕರ್ಯ ಕಾರ್ಯಕ್ರಮದಲ್ಲಿ ಕೇಂದ್ರದ ಪಾಲಿನಲ್ಲಿ 127.76 ಕೋಟಿ ಮತ್ತು ರಾಜ್ಯದ ಪಾಲಿನಲ್ಲಿ 85.17 ಕೋಟಿ ರುಪಾಯಿ ಖರ್ಚಾಗಿರಲಿಲ್ಲ.
ಕೋವಿಡ್ 19ರ ಅಡಿಯಲ್ಲಿ ರಾಷ್ಟ್ರೀಯ ಆರೋಗ್ಯ ಆಭಿಯಾನಕ್ಕೆ 597.53 ಕೋಟಿ ರುಪಾಯಿ ಬಿಡುಗಡೆಯಾಗಿದ್ದರೂ ಎರಡು ಲೆಕ್ಕ ಶೀರ್ಷಿಕೆಯಡಿಯಲ್ಲಿ 421.66 ಕೋಟಿ ರು ವೆಚ್ಚವಾಗಿರಲಿಲ್ಲ.
ಕೆಎಸ್ಎಂಎಸ್ಸಿಎಲ್ ಮೂಲಕ ಡಿಸ್ಪೋಸಬಲ್ ವೈದ್ಯಕೀಯ ಪರಿಕರಗಳ ಖರೀದಿಗೆ 50 ಕೋಟಿ ರು ಅನುದಾನ ಮಂಜೂರಾಗಿತ್ತು. ಆದರೆ ಈ ಅನುದಾನವನ್ನು ಪರಿಷ್ಕರಿಸಿದ್ದ ಹಿಂದಿನ ಬಿಜೆಪಿ ಸರ್ಕಾರವು ಅದನ್ನು 5.70 ಕೋಟಿಗೆ ಪರಿಷ್ಕರಿಸಿತ್ತು. ಆದರೆ ಈ ಅನುದಾನವನ್ನೂ ಖರ್ಚು ಮಾಡಿರಲಿಲ್ಲ. ಪ್ರಾಥಮಿಕ ಆರೋಗ್ಯ ಸೌಲಭ್ಯಗಳನ್ನು ಬಲಪಡಿಸಲು ಹದಿನೈದನೇ ಹಣಕಾಸು ಆಯೋಗದಲ್ಲಿ ಮಂಜೂರಾಗಿದ್ದ 991.32 ಕೋಟಿ ರುಪಾಯಿಯಲ್ಲಿ 788.63 ಕೋಟಿ ರುಪಾಯಿ ಖರ್ಚಾಗಿರಲಿಲ್ಲ.
2023-24ನೇ ಸಾಲಿನಲ್ಲಿ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಿಗಾಗಿ 934.12 ಕೋಟಿ ರುಪಾಯಿ ಅನುದಾನವು ಮಂಜೂರಾಗಿತ್ತು. ಈ ಪೈಕಿ 926.40 ಕೋಟಿ ರುಪಾಯಿ ಬಿಡುಗಡೆಯಾಗಿತ್ತು. ಇದರಲ್ಲಿ 898.44 ಕೋಟಿ ರು ಖರ್ಚು ಮಾಡಿದ್ದ ಇಲಾಖೆಯು 35.68 ಕೋಟಿಯನ್ನು ವೆಚ್ಚ ಮಾಡಿರಲಿಲ್ಲ. ಹಾಗೆಯೇ ಭಾ.ಸ ಮಾದರಿಯಲ್ಲಿ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಿಗಾಗಿ (ಎಂಎನ್ಪಿ) ಮಂಜೂರಾಗಿದ್ದ 703.51 ಕೋಟಿ ರುಪಾಯಿ ಪೈಕಿ 704.81 ಕೋಟಿ ರುಪಾಯಿ ಬಿಡುಗಡೆಯಾಗಿತ್ತು.
ಇದರಲ್ಲಿ 680.63 ಕೋಟಿ ರುಪಾಯಿ ಖರ್ಚಾಗಿದ್ದರೇ 22.88 ಕೋಟಿ ರುಪಾಯಿ ವೆಚ್ಚವಾಗಿರಲಿಲ್ಲ. ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ ಗ್ರಾಮಾಂತರ ಕುಟುಂಬ ಕಲ್ಯಾಣ ಕಾರ್ಯಕ್ರಮಗಳಿಗೆ ಬಿಡುಗಡೆಯಾಗಿದ್ದ 161.43 ಕೋಟಿ ರುಪಾಯಿನಲ್ಲಿ 144.73 ಕೋಟಿ ರುಪಾಯಿ ಖರ್ಚು ಮಾಡಿದ್ದ ಇಲಾಖೆಯು 10.91 ಕೋಟಿ ರು ವೆಚ್ಚ ಮಾಡಿರಲಿಲ್ಲ.
ಆಶಾ ಕಾರ್ಯಕರ್ತೆಯರ ಗೌರವ ಧನಕ್ಕೆ ಬಿಡುಗಡೆ ಮಾಡಿದ್ದ 255.14 ಕೋಟಿ ರುಪಾಯಿನಲ್ಲಿ 243.85 ಕೋಟಿ ರುಪಾಯಿ ಖರ್ಚು ಮಾಡಿತ್ತು. 11.29 ಕೋಟಿ ರುಪಾಯಿ ಖರ್ಚು ಮಾಡಿರಲಿಲ್ಲ. ರಾಷ್ಟ್ರೀಯ ಗ್ರಾಮೀಣ ಆರೋಗ್ಯ ಅಭಿಯಾನ ಕೇಂದ್ರದ ಪಾಲಿನಲ್ಲಿ 264.84 ಕೋಟಿ ಮತ್ತು ರಾಜ್ಯದ ಪಾಲು 117.54 ಕೋಟಿ ರು ಸೇರಿ ಒಟ್ಟಾರೆ 372.38 ಕೋಟಿ ರುಪಾಯಿ ಖರ್ಚೇ ಆಗಿರಲಿಲ್ಲ. ಹಾಗೆಯೇ ಪ್ರಾಥಮಿಕ ಆರೋಗ್ಯ ಸೌಲಬ್ಯಗಳನ್ನು ಬಲಪಡಿಸಲು ಹದಿನೈದನೇ ಹಣಕಾಸು ಆಯೋಗವು ನೀಡಿದ್ದ ಒಟ್ಟು ಅನುದಾನದಲ್ಲಿ 541.36 ಕೋಟಿ ರುಪಾಯಿ ವೆಚ್ಚವಾಗಿರಲಿಲ್ಲ.
2024-25ನೇ ಸಾಲಿನಲ್ಲಿ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಿಗೆ ಬಿಡುಗಡೆಯಾಗಿದ್ದ 1,051.83 ಕೋಟಿ ರುಪಾಯಿನಲ್ಲಿ 98323 ಕೋಟಿ ರು ಖರ್ಚು ಮಾಡಿದ್ದ ಇಲಾಖೆಯು 68.60 ಕೋಟಿ ರುಪಾಯಿ ವೆಚ್ಚ ಮಾಡಿರಲಿಲ್ಲ.
